محمية جبل علبة
2019/03/18 10:38 ص
من الأماكن السياحية اللى لسه بكر تماماً ومش كتير اللى وصلوا لها وزاروها واستمتعوا بجمال أرضها وطيبة أهلها محمية جبل علبة
كل ما تحتاج معرفته عن محمية جبل علبه :
1- المحمية هى تانى أكبر محمية طبيعية فى أقصى جنوب شرق مصر بعد محمية الجلف الكبير فى أقصى الجنوب الغربى
2- المحمية بتبلغ مساحته 35600 كم مربع ، السلسلة الجبلية فى المحمية أعلاها قمة جبل شنديب 1911 م وأقلها قمة جبل حر حجيت 542 م فوق مستوى سطح البحر، لكن قمة علبة ارتفاعها 1474 م.
3- المحمية فيها التيتل والغزال المصرى والنسر الأفريقى، لكن مفيهاش سنجاب ولا زراف ولا حمار وحشى عشان المعلومات المغلوطة اللى بتوصل للبعض.
4- السلسلة الجبلية دى هى آخر جزء فى جنوب مصر من سلسلة جبال البحر الأحمر اللى بتبتدى من خليج السويس وبتنتهى فى أثيوبيا، وأعلى قمة جبلية فى سلسلة البحر الأحمر فى مصر هى قمة جبل الشايب فى الغردقة 2185 م.
5- المحمية بتضم ثروة بحرية من شعاب وحشائش بحرية غايه فى الروعه وفيها طيور نادرة وانواع من اشجار المنجروف وحياه جيولوجية قيمة جدا
6- المحمية بتبعد عن القاهرة حوالى 16 ساعه من موقف الترجمان فيه اتوبيس جنوب الصعيد بيطلع لشلاتين وفى فنادق متواضعه فى شلاتين للى عاوز يقعد هناك
7- لو المشوار طويل عليك فى حل تانى وهو انك تروح مرسى علم تقعد هناك كام يوم لو تحب و من هناك تركب لشلاتين و من شلاتين تركب باص لابو رماد بيتحرك من شلاتين 7 الصبح بتوصل 8 ونص و تطلع علي مبنى المخابرات على طول عشان تعمل
التصاريح وتطلع الجبل
8- بتاخد تصريح المخابرات و تطلع جبل علبة.. التصريح بيطلع علي طول بصورة بطاقتك بس والجبل لازم تتفق مع عربية من هناك و تاخد معاك مياه كتيييير عشان انت خلاص هتبقي في الخلا ومفيش ميه خالص اخر باص بيتحرك من ابو رماد بيكون الساعة 2
الضهر
9 - أفضل وقت لزيارة محمية جبل علبة فى فصل الشتاء موسم الامطارعلشان تقدر تشوف المناظر الرائعه دى
10 - الصور اللى هتشوفها دلؤقتى دى مش محتاج تسافر غابات افريقيا ولا تايلاند ولا اى مكان بره مصر انت ممكن توفر فلوس السفر للخارج وتشوف الجمال دة جوه بلدك وتستمتع بالطبيعه الساحرة فى جبل علبة بعد موسم الامطار .. المكان المنسى سياحياً واللى
يعتبر من كنوز مصر الثرية بالتنوع والجمال
ازاى اسافر لجبل علبه باقل تكلفة وايه البرنامج الي اقدر اعمله هناك ؟
اول حاجه المواصلات هتركب أتوبيس جنوب الصعيد ب 190 جنيه من القاهره لمدينه شلاتين
وتقضي يوم او يومين في مدينه شلاتين المدينه جميله جدا :هناك هتتعرف علي ثقافات وعادات جديده وتشوف قبائل البجا تقدر تروح عن طريق انك تستني اتوبيس جنوب الصعيد لو انتا في مرسي علم زى ما قولنا فوق ممكن من موقف مرسي علم هتلاقي مواصلات لشلاتين
الاقامه هناك في فنادق 3 نجوم اسعارهم مابين 150 لــ 300 جنيه واشهر الفنادق فندق الحرمين وفندق د برغوت وفندق بساطه
شلاتين مدينه جميله جدا تقدر تشوف فيها سوق الجمال بشلاتين .
خلصت مدينة شلاتين تشد الرحال لقرية ابو رماد علشان توصل جبل علبه وهناك هتقدر تطلع تصريح طلوع جبل علبه من مكتب المخابرات هناك التصريح مفهوش اي مشكله بس احيانا ممكن تضطر تبات هناك وتاخد التصريح في اليوم التالي او ممكن ظابط
المخابرات يرفض انه يديك التصريح لأسباب أمنية .
طلعت التصريح خلاص بيطلع من الشروق للغروب ولازم تكون في ابو رماد وقت الغروب لان الطرق بتتقفل .
تتفق مع سواق هناك هيخدك ويوديك الجبل ويكون معاك دليل جبل علبه مستوي التسلق بتاعه متوسط وفي اماكن صعبه التسلق
طيب هتشوف ايه فى محيط جبل علبة ؟
اهم حاجه هناك واشهرها هي أشجار الاومبيت وممكن تشوف التيتل وعنكبوت الجمل وانواع كتير من الزواحف
رجعت من الجبل خلاص او معرفتش تتطلع التصريح في برنامج بديل وممتع جدا هو انك تقضي يوم في وادي في وسط الصحراء .
تقدر تروح وادى أبو سعفة بمنطقة أبرق
والمنطقة دى فيها آثار ما بين نقوش جدارية من عصور ما قبل التاريخ واثار فرعونية في منطقة أبو سعفة – وقلاع رومانية قديمة أعلى جبل أبرق والعرقة – بجانب ضريح الشيخ حميد ودة بيقام له مولد سنوى احتفالا لذكرى وفاته.